Dalang Setan dies Natalis Unnes`

Pagelaran wayang kulit kang digelar ing area parkir auditorium Unnes yaiku kanggo mengeti Dies Natalis Unnes (30/3). Pagelaran kang diwiwiti jam 20.00 WIB nganti jam 04.00 WIB dikebaki dening civitas akademika lan warga sakjroning Unnes.

Pagelaran kan didalangi dening Ki Mantep Soedharsono ngringgit lakon “Sri Boyong“. Nyeritakake babagan negri Ngamarta, Mandura, lan Dwarawati kang katekan mangsa pageblug lan paceklik, kedadeyan iku amarga rakyate wis ora gelem ngreksa bumi. Banjur diutus Bambang Probo Kusuma kanggo golek mustikaning retna yaiku Dewi Sri kan mujudaken makmure jagad.

Ki Manteb Soedharsono kang jejuluk “Dalang Setan” uga ngamati kahanan Indonesia yaiku akehing aksi  demo mahasiswa kang nolak mundhaking BBM. Ngendikane, aspirasi menika bisa dilakokake kanthi cara kang luwih apik lan ora anarkhis. “Kabeh isa dilakoni ing negara demokrasi, nanging yen dijiwit kuwi lara ya aja nglarani liyane,” ngendikane dalang kang dadi bintang oskadon oye kuwi.

Sakliyane ditayangkake ing TVRI, antusiasme kang deleng uga katon rame. Mahasiswa BSJ rombel 5 njaluk langgam “eman-eman” anggitane Ki Manteb, kairing jogedan dening dagelan Gareng Ngesti Pandawa dan Bagong Banyubiru kang katon gawe kahanan sansaya rame. Charisfa